transporté l’auoyt. Aulcuns le dirent, estant ieune aignelet, par quelque aigle, duc, ou chauant[1] la rauy, s’estre entre les buissons saulué. Surmontans la difficulté de l’entree à poine bien grande et non sans suer, trouuasmes le dessus du mons tant plaisant, tant fertile, tant salubre et delicieux, que ie pensoys estre le vray iardin et paradiz terrestre, de la situation duquel tant disputent et labourent les bons theologiens. Mais Pantagruel nous affermoit la estre le manoir d’Arete (c’est Vertus), par Hesiode descript, sans toutesfoys preiudice de la plus saine opinion. La gouuerneur d’icelle estoit messere Gaster, premier maistre es ars de ce monde. Si croyez que le feu soit le grand maistre des ars, comme escript Ciceron, vous errez, et vous faictes tort. Car Ciceron ne le creut oncques. Si croyez que Mercure soit premier inventeur des arts, comme iadis croyoient nos antiques druydes, vous fouruoyez grandement. La sentence du satyricque[2] est vraye, qui dict messere Gaster estre de tous arts le maistre. Auecques icelluy pacificquement redisoit la bonne dame Penie, aultrement dicte Souffreté, mere des neuf Muses : de laquelle iadis, en compaignie de Porus, seigneur d’Abundance, nous nasquit Amour, le noble enfant mediateur du ciel et de la terre, comme atteste Platon in Symposio. A ce cheualereux roy force nous feut faire reuerence, iurer obeissance et honneur porter. Car il est imperieux, rigoureux, rond, dur, difficile, inflectible. A luy on ne peult rien faire croyre, rien remonstrer, rien persuader. Il ne oyt poinct[3]. Et comme les Egyptiens disoyent Harpocras, dieu de silence, en Grec nommé Sigalion, estre astome, c’est a dire sans bouche, ainsi Gaster sans aureilles feut créé, comme en Candie le simulachre de Iupiter estoyt sans aureilles. Il ne parle que par signes. Mais, a ces signes, tout le monde obeyst, plus soubdain qu’aux edictz des preteurs & mandemens des roys : en ses sommations, delay aulcun et demoure aulcune il n’admect. Vous dictes que au rugissement du lion toutes bestes loing a l’entour fremissent, tant (sçauoir est) qu’estre peult sa voix ouye. Il est escript. Il est vray. Ie l’ay veu. Ie vous certifie que au mandement de messere Gaster tout le ciel tremble, toute la terre bransle. Son mandement est nommé Faire le fault sans delay, ou mourir.
Le pilot nous racontoit comment ung iour, a l’exemple des membres conspirans contre le ventre, ainsi que descript Esope, tout le royaulme des Somates[4] contre luy conspira et coniura soy soubstraire de son obeissance. Mais bien toust s’en sentit, s’en repentit, et retourna en son seruice en toute humilité. Aultrement tous de male famine perissoyent. En quelques compaignies qu’il soit, discepter[5] ne fault de superiorité et preference, tousiours va deuant : y feussent roys, empereurs, voyre certes le pape. Et au concile de Basle le premier alla, quoyqu’on vous die que ledict concile feut sedicieux, a cause des contentions et ambitions des lieux premiers[6]. Pour le seruir, tout le monde est empesché, tout le monde labeure. Aussi, pour
- ↑ Chat-huant.
- ↑ Perse.
- ↑ On dit proverbialement : Ventre affamé n’a pas d’oreilles.
- ↑ Du corps humain.
- ↑ Disputer.
- ↑ Premières places. Le concile de Bâle, convoqué par Martin V, dura depuis l’année 1431 jusqu’en 1439.
