l’ennemy se pouroyt prévaloir et pour néantmoingtz son pouvoir par iceulx subjets aydera leur besoing, avec déffences très expresses audit cappitaine et tous autres de ne permettre leur estre faict aulcung tort.
Ledit Sr de Rochebonne depputera à la garde de chasque lieu cellui des habitants notables, voysins, qui sera capable pour y commander sans frais, actendu que chacun mesmes les personnes aysées ne doivent desnier le service de sa personne pour la conservation de la ville dont il est, ou soubz la garde de laquelle il est, de sa famille et de ses biens, ayant aussy esgard aux aultres grandes surcharges qu’il conviendra supporter au peuple. Et au surplus fera observer partout le règlement général faict pour la garde des villes et lieux serrés. Et, quant à certains lieux qui pourroient sembler de plus d’importance, commettre des membres de ladite compagnie avec le nombre de soldatz que verra estre à faire.
Respondu à Beaucaire ce 19e jour de novembre mil cinq cent soixante et douze (1572). Signé : de Montmorency.
Scellé est, plus bas : pour mondit seigneur, Charretier.
Extraict de l’Original, estant au pouvoir du Sr de Rochebonne, par moy collationé.
III
Lettre de Monseigneur l’Évêque du Puy à Messieurs les gens des
Troys estatz du haut et bas Vivarais.
Depuis les premiers propos qu’avons tenus ensemble au Monestier pour contracter une société, union et confédération d’entre les bons et fidelles habitants des deux pays, come nature en a joinctz les terroirs de l’ung à l’aultre, pour avoir plus de force, de moyen ou d’intelligence de s’opposer aux sinistres desseinctz des ennemys, pour remettre la liberté esdits pays et en chasser la servitude de tyrannie qu’ilz y exercent, je n’ay pensé à aultre chose qu’à effectuer une si saincte et utille délibération, tellement
