Cette page a été validée par deux contributeurs.
L’une et l’autre main a tendue
Li sains vers Deu et si s’argue :
Deu prie que il, par sa grace,
Aige del ciel venir li face.
Lors li vint tantost une nue
Qui ot assez aige tenue.
Li sains i prist de la rosée,
La dame en a tote arosée.
Lors baptisa la dame sainte,
Si fist-il autre dame mainte.
Mener la fist, à grant vilté,
Daciens fors de la sité
Et comanda que fust ocise,
Si com ele ert en sa chemise.
Ains que fust ocise ni morte,
Li Sains docement la conforte
Et mult très debonairement
Et li dist si faitierement :
« Aiès bon cuer et rien ne dote,
Damne-Dé est o tei sans dote. »
