Poème de la prison/Ballade LX
Quant Souvenir me ramentoit
La grant beauté dont estoit plaine,
Celle que mon cueur appeloit
Sa seule Dame souveraine,
De tous biens la vraye fontaine,
Qui est morte nouvellement.
Je dy, en pleurant tendrement :
Ce monde n’est que chose vaine.
Ou vieil temps grant renom couroit
De Creséide, Yseud, Élaine
Et maintes autres qu’on nommoit
Parfaittes en beauté haultaine.
Mais, au derrain, en son demaine
La Mort les prist piteusement ;
Parquoy puis véoir clerement
Ce monde n’est que chose vaine.
La Mort a voulu et vouldroit,
Bien le cognois, mettre sa paine
De destruire, s’elle povoit.
Liesse et Plaisance Mondaine,
Quant tant de belles dames maine
Hors du monde ; car vrayement
Sans elles, à mon jugement,
Ce monde n’est que chose vaine.
Amours, pour vérité certaine,
Mort vous guerrie fellement ;
Se n’y trouvez amendement.
Ce monde n’est que chose vaine.