Poème de la prison/Ballade LXXI
BALLADE LXXI.
J’oy estrangement
Plusieurs gens parler,
Qui trop mollement
Se plaingnent d’amer ;
Car, legierement.
Sans paine porter,
Vouldroient, briefment,
À fin amener
Tout leur pensement.
C’est fait follement
D’ainsi desirer ;
Car qui loyaument
Veulent acquester
Bon guerdonnement,
Maint mal endurer
Leur fault, et souvent
À rebours trouver
Tout leur pensement.
S’Amour humblement
Veulent honnourer,
Et soingneusement
Servir, sans faulser ;
Des biens largement
Leur fera donner ;
Mais, premierement,
Il veult esprouver
Tout leur pensement.