Poème de la prison/Ballade XLI
Espoir m’a apporté nouvelle
Qui trop me doit reconforter,
Il dit que Fortune, la felle,
À vouloir de soy raviser
Et toutes faultes amender
Qu’a faittes contre mon plaisir,
En faisant sa roe tourner.
Dieu doint qu’ainsi puist avenir !
Quoy que m’ait fait guerre mortelle,
Je suis content de l’esprouver,
Et le desbat qu’ay et querelle
Vers elle je veuil delaisser
Et tout courroux lui pardonner ;
Car d’elle me puis bien servir,
Se loyaument veult s’acquicter.
Dieu doint qu’ainsi puist avenir !
Se la povoye trouver telle
Qu’elle me voulsist tant aidier
Qu’en mes bras je peusse la belle,
Une fois, à mon gré trouver,
Plus ne vouldroye demander,
Car lors j’auroye mon desir
Et tout quanque doy souhaidier.
Dieu doint qu’ainsi puist avenir !
Amour, s’il vous plaist commander
À Fortune de me chierir,
Je pense joye recouvrer ;
Dieu doint qu’ainsi puist avenir!