Poème de la prison/Ballade XXIV
Mon cueur au derrain entrera
Ou paradis des amoureux,
Autrement tort fait lui sera,
Car il a de maulx doloreux
Plus d’un cent, non pas un ou deux,
Pour servir sa belle maistresse ;
Et le tient Dangier, le crueulx,
Ou purgatoire de Tristesse.
Ainsi l’a tenu, long temps a,
Ce faulx traistre, vilain, hideux ;
Espoir dit que hors le mettra
Et que n’en soye jà doubteux.
Mais trop y met, dont je me deulx ;
Dieu doint qu’il tiengne sa promesse
Vers lui, tant est angoisseux
Ou purgatoire de Tristesse !
Amour grant aumosne fera,
En ce fait cy, d’estre piteux,
Et bon exemple monstrera
À toutes celles et à ceulx
Qui le servent, quant désireux
Le verront, par sa grant humblesse,
D’aidier ce povre souffreteux
Ou purgatoire de Tristesse.
Amour ! faittes moy si eureux
Que mettez mon cueur en liesse :
Laissiez Dangier et Dueil tous seulx
Ou purgatoire de Tristesse.