Poésies de Marie de France (Roquefort)/Fable LXXXV
Poésies de Marie de France, Texte établi par B. de Roquefort, Chasseriau, , tome II (p. 353-354).
FABLE LXXXV.
Ci vus racunte en ceste Fable
C’uns Vileins traist fors de s’estable[2]
Od ses Bués le fiens que il firent ;
Li Bués par tençun l’assaillirent.
Si reprouchèrent au Vilain ;
La bune cervoise et le pain[3],
Que par lur traveil ot éu.
Mais malement lui a rendu
K’à grant hunte les démena ;
Li Vileins si lur demanda
Pur ce esteit ke lur fist faire
Le fiens de l’estable fors-traire ;
Dist li Vilains vus le semastes
E la mèsun en encunbrastes :
Li Buef dient c’est véritez ;
Dunc s’est li Vileinz purpensez,
Si lur respunt ke hors le traient
Bien est dreit que le mal en aient.
Ensi vet dou malvais Sergant[4]
Qi tute jur va repruchant
Sun grant servise à sun Ségnur ;
Ne se prent garde à l’ennur,
Ne des biens, ne du gueredun[5],
Qu’il a éus en sa maisun ;
De çou quit meffet è mesprent
Ne li puet survenir noient,
Qant sun travail velt réprimer
De sun meffait li deit menbrer.
- ↑ Le Grand d’Aussy, Fabliaux in-8o, tom. IV, p. 229.
- ↑ Qu’on paysan retiroit hors de son étable, le fumier produit par ses bœufs.
- ↑ Cervoise, bière.
- ↑ Serviteur, domestique, ouvrier, apprenti. Serviens.
- ↑ De la récompense, des cadeaux.