Poésies de Marie de France (Roquefort)/Fable XLV
Poésies de Marie de France, Texte établi par B. de Roquefort, Chasseriau, , tome II (p. 222-224).
FABLE XLV.
Jadis avint k’en un pasquis[2]
Ot grans cumpengnies de Berbis.
Un Bret[3] s’aleit esbanoier
Parmi le chams od sa Moulier[4].
Les Berbiz sans garde truva,
Une en ocist, si l’empurta ;
E chascun jur i reveneit
Si les ocioit è porteit.
Les Berbis mult s’en currecièrent,
Entr’aus distrent è cunseillièrent,
Que ne se volrunt pas deffendre[5]
Par droite iror se lerunt prendre,
Ne jà ne se desturnerunt
Ne pur rien môt ne li dirunt.
Tant atendirent lor Berchun[6]
Qe ni remest fors un Moutun,
Qui tus seus se vit sans cumpengne
Ne pot tenir que ne s’en plengne.
Grant lasqueté, fet-il, féismes[7],
E mult mavais cunssel préismes,
Qant nus grant cumpaigne estiens
Et qant nus ne nus deffendiens
Verz chest Homme qui à grant tort
Nus a tus pris è trait à mort.
Pur ce dit-um en reprovier,
Plusour ne sevent damagier
Ne contrester lur anemis
Qu’il ne facent à auz le pis.
- ↑ Anon. Nilant. Verveces et Lanius.
Le Grand d’Aussy, Fabliaux in-8o tom. IV, p. 248. - ↑ paturage.
- ↑ Quelques manuscrits portent Loup au lieu de Breton.
- ↑ Avec sa femme.
- ↑ Qu’elles ne se défendront nullement et qu’elles se laisseront prendre.
- ↑ Tant attendirent à prévenir leur gardien, le berger, qu’il ne resta plus qu’un seul mouton.
- ↑ Nous avons commis une grande lâcheté et pris un bien mauvais conseil.