Poésies de Marie de France (Roquefort)/Fable XCIII

Marie de France

Dou Corbel, f. XCIII

Traduction par B. de Roquefort.
Poésies de Marie de France, Texte établi par B. de Roquefort, Chasseriau, 1820, tome II (p. 372-373).

FABLE XCIII.

Dou Corbel^[1].

Ci vus racunte d’un Corbel
Ki enseigneit un sien Oisel ;
Si ne deveit nul Hum atendre
K’il volsist encunbrer ne prendre.
S’Ome véist bessier à terre^[2],
Prenre bastun, ou pierre querre,
^[a]Dunc s’en devreit aillurs voler,
Qe cil ne le puist encumbrer.
Se jou n’el voi, fet-il, beiissier.
N’entre ses mains riens manoier^[3]10
Doi-jou me dunques remuer ?

^[b]Li Corb respunt : lais-me ester^[4],
Jeo ne te deis mie ensengnier
Car tu n’en as noient mestier^[5].
Vole par toi et si t’aïe^[6],
Or n’ai mès doute de ta vie ;
A mes autres Oiseax irai,
A mun pooir lur aiderai.

MORALITÉ.

Par cest essanple nus dit tant,
Qant Hum a nurri sun enfant20
Qu’il le veit saige et veisié.
Le cuer en a joiant et lié ;
A sun cunssel le deit lessier
E puis les autres cunseillier.

1. Le Grand d’Aussy, Fabliaux in-8^o, tom. IV, p. 181.
2. S’il voyoit un homme s’abaisser pour ramasser un bâton ou une pierre.
3. N’avoir rien entre ses mains.
4. Laisse-moi en repos.
5. Aucunement besoin.
6. Vole tout seul et aide-toi.

Variantes.

1. Anchois alast aillors aler,
   Qu’il ne peust prendre, n’encombrer.

2. Li Corbeax dit : lai-moi m’ester.
   Vole partout.