Orig. – Arch. du canton de Genève. Copie transmise par M. Rigaud, premier syndic, et par M. L. Sordet, archiviste.
Magnifiques Seigneurs, Tous les gens de bien doibvent tant et de si long temps à voz vertu, pieté et constance, et au zele singulier que vous avez toujours demonstré à l’advancement de la gloire de Dieu, et au bien, conservation et prospérité des Esglises de ce Royaume, que ce seroit une trez evidente ingratitude de ne le recognoistre, et ne le vous faire cognoistre par effect, et s’employer pour vous partout où l’occasion se presentera. Je l’ay faict entendre et représenté vivement aux depputez des Esglises qui se sont trouvez en ceste assemblée, afin de vous donner contentement sur l’occasion du voyage de ce porteur. Mais ils n’ont faict tout ce que j’eusse bien desiré, ainsy que ledict porteur vous pourra faire plus particulierement entendre. Sur lequel m’en remettant, je ne vous en diray davantage, si ce n’est pour vous prier de vous asseurer et faire entier estat de ma bonne volonté envers vous, et de tout ce qui sera en mon pouvoir et debvoir ; sur ce, priant Dieu vous vouloir, Magnifiques Seigneurs, conserver longuement et heureusement. De Montauban, le xxje d’aoust 1578.
HENRY.