Orig. – Arch. de la famille Forget de Fresne. Communication de M. le chevalier Artaud de Montor, membre de l’Institut, allié de la famille Forget.
À FORGET,
Forget, Lorsque à vostre supplication je feis don à vostre serviteur d’un estat de sergent à Chasteauneuf et Campron, pour ung nommé Pierre Gauterot, vous ne me fistes entendre que jamais n’avoit esté pourveu à aucune des douze sergentises de Chasteauneuf qui ont esté de tout temps et ancienneté du Domaine, la quarte partie duquel appartient à monsieur le prince de Condé, mon cousin. Et sans le consentement de mon dict cousin, oultre la perte que me apporteroit la provision du dict estat, je ne voudroys rien innover au dict Chasteauneuf en ce qui despent du dict Domaine ; et ne le pourroys faire sans le dedommager. Toutesfois voulans le dict Gauterot se faire recevoir au dict estat par le juge du dict Chasteauneuf, Alegrin, mon procureur, s’y est opposé. Non obstant laquelle son opposition, le dict juge a declairé qu’il passeroit oultre ; dont mon dict procureur est appellant. Sur laquelle appellation le dict Gauterot a faict anticiper mon dict procureur : chose que je n’ay jamais entendue, moins et encore que ledict estat de sergent fust prejudiciable à mon dict cousin et à moy. Cela est cause que je vous prie faire cesser cet incident et y donner tel ordre que je n’en oye plus parler ; car je ne veulx me servir du dict Gauterot au dict estat de sergent. Et n’estant la presente à autre fin, je prieray Dieu vous avoir, Forget, en sa saincte garde.
De Maseres, ce xvje apvril 1579.
HENRY.