Recueil des lettres missives de Henri IV/1579/30 avril ― À mon cousin monsieur de Dampville

◄

précédente

Henri IV Lettres missives 1579

suivante

►

1579. — 30 avril. – II^me

Orig. – B. R. Fonds Béthune, Ms. 8848, fol. 79 recto.

À MON COUSIN MONS^R DE DAMPVILLE

MARESCHAL DE FRANCE.

Mon Cousin, J’ay receu celle que vous m’avés escript par mons^r de Turenne et entendu ce que luy et le s^r de Rouzines m’ont dict de vostre part. Je suis bien fort marry que je n’ay eu ce plaisir de vous veoir, auparavant que vous esloigniés de ces quartiers. Ce que je desire infiniment, pour vous dire à bouche l’entiere affection et bonne volonté que j’ay de vous faire cognoistre par effect l’amitié que je vous porte, vous priant croire, mon Cousin, que je ne cederay à personne de ce monde qui vous soit plus affectionné amy que je vous suis, ainsy que j’ay prié le dict de Rouzines vous dire de ma part. Sur lequel me remettant, je prieray Dieu vous donner, mon Cousin, l’heureuse et longue vie que vous desire

Vostre bien affectionné cousin et asseuré amy,
HENRY.

De Mazeres, ce dernier d’apvril 1579.

Je vous prie, mon Cousin, vouloir mettre Espervin en liberté, pour l’amour de moy, et luy pardonner la faulte qu’il a faicte^[1].

1. Ce post-scriptum est de la main du roi.