Orig. – Arch. de famille de M. le comte H. C. de Meslon. Envoi de M. le secrétaire général du département de la Gironde.
Monsr de Melon, Les catholiques de la ville de Monsegur m’ont faict entendre qu’on demolissoit leurs maisons qu’ilz ont en la dicte ville et m’ont supplié de faire cesser les dictes demolissions, me promettant et asseurant que, pourveu que je les face cesser, ilz se comporteront à l’advenir paisiblement et amiablement envers ceux de la Religion. Et d’autant que je desire les gratifier en cela et leur oster toute occasion d’aigreur contre ceux de la dicte Religion, je vous prie d’empescher, soudain la presente receue, toutes les demolitions, et traiter les dicts catholiques le plus gratieusement qu’il vous sera possible, tant en leurs personnes qu’en leurs biens. Et m’asseurant que vous desirez que toutes choses aillent bien et que ma volunté soit en cela suyvye, ne vous feray ceste ci plus longue, que pour prier Dieu, monsr de Melon, vous tenir en sa saincte garde. De Saincte Foy, ce xxve novembre 1580.