Cop. – Arch. du Royaume, section historique, série K, carton 99, liasse n° 5.
Monsieur, J’ay entendu de mon oncle, le duc de Montpensier, ce qui s’est passé par les propos sur lesquels monsr de Nevers luy dresse sa querelle, dont il vous a supplié vous ressouvenir et les luy mander ou escrire pour les advouer (ne le pouvant ny voulant faire aultrement, pour ce que nous vous tenons tous pour prince tres veritable), et d’aultant que cela luy sert infiniment pour en esclaircir ceulx qui en pourroient doubter. Estant resolu de n’adjouster ny diminuer à ce que vous en direz, je vous suplie tres humblement, Monsieur, luy vouloir faire cest honneur et à moy (qui suis si joinct et uny avec luy, tant pour la proximité du sang que pour avoir cest honneur d’estre chef du nom et de la maison, et pour l’amitié que je luy porte, que j’estime ce faict me toucher comme à luy mesme, qui vous est tant serviteur, comme nous tant le sommes si fidelles et affectionnez), que vous prandrez tousjours sa cause en main et ne souffrirez point que l’honneur de nostre maison, qui prend sa source de la vostre, soit aulcunement interessé. Ce me sera particulierement une tres grande obligation pour demeurer à jamais
et serviteur,