Orig. – Arch. de famille de M. le comte H. C. de Meslon. Envoi de M. le secrétaire général du département de la Gironde.
AU SR DE MESLON,
Meslon, Aprés qu’il a pleu à Dieu nous affliger par les miseres de la guerre (à laquelle, comme nous sommes entrés par contraincte et par necessité, aussy avons nous travaillé d’en sortir par les remedes provenans de la bonté et benignité du Roy et par la tres grande peine qu’il a pleu à Monsieur de prendre, meu d’ung singulier desir qu’il porte à cet Estat), nous sommes parvenuz à une bonne paix ; dont nous avons à louer grandement la Providence divine, esperans que mon dict Sieur, executeur de ce qui a esté resolu, nous en rendra joïssans, et que soubz ce benefice nous aurons le moyen de respirer long temps de tant de calamitez. Estant donq la dicte paix publiée, ainsy que verrez par l’acte qu’il vous envoye et la lettre qu’il vous escrit, j’ay bien voullu adjouster ceste-cy pour vous prier, Meslon, qu’obeissant au vouloir du Roy et au commandement de mon dict Sieur, vous faictes publyer, garder et observer la dicte paix par tous les lieux de vostre gouvernement, faisant cesser tous actes d’hostilité, toutes contributions, prinses, levées de deniers, gardes et autres actions, qui[1] [porteroient forme] de guerre, sur peine aux contrevenans d’estre [recherchés et pugnis comme infracteurs] de la paix et tranquillité publique. [Par quoy, Meslon, serons] demonstrans nostre obeissance et [le debvoir que mon dict Sieur] a constituez sur nous. Dont m’asseurant [que rendrez tesmoignage] par tous bons et vrays effectz, prieray Dieu, Meslon, vous avoyr en sa tressaincte et digne garde. De Coutras, ce ixe jour de janvier 1581.
- ↑ Tous les mots suppléés entre crochets manquent dans la copie qui nous a été envoyée de Bordeaux, ainsi que dans l’original.