Recueil des lettres missives de Henri IV/1583/19 juillet ― À mon cousin monsieur le mareschal de Matignon

La bibliothèque libre.
Sauter à la navigation Sauter à la recherche



[1583. — 19 juillet[1]. — Ire.]

Orig. autographe. — B. R. Fonds Béthune, Ms. 8828, Fol. 20 recto.

Cop. — B. R. Suppl. Fr. Ms. 1009-4.


À MON COUSIN MONSR LE MARESCHAL DE MATIGNON.

Mon Cousin, Je vous envoye les lettres que j’escrips au Roy, sur ce qui a esté deliberé entre nous pour le fait du Casse ; lesquelles je vous prie faire tenir avec les vostres. Et ce pendant j’ay ordonné au sr de Baraut de commander un bon nombre de pionniers pour mettre la main à l’œuvre dés demain matin. Et cela fait, nous en ferons, si vous le trouvés bon, une plus ample despeche à Sa Majesté. Je ne veulx aussy oublier à vous dire que le chasteau de Comiac, qui est au sr de St Sulpice, a esté rendu et deslaissé, suivant la despesche que j’en avois faict, et n’oublieray rien de tout ce qui sera en mon pouvoir, pourveu qu’on y procede de mesmes. Mais il vient de là plusieurs et diverses plaintes, que cy-aprés je vous feray entendre et qui requierent remede, que j’espere que nous y apporterons ensemble, et que nous en viendrons à bout pour le service du Roy, et que vous me tiendrés tousjours pour

Vostre plus affectionné cousin et bien asseuré amy,


HENRY.


Depuis, nous avons, ce jourd’huy jeudy, faict desmolir grande partie des fortifications. Nous acheverons demain et samedy.


  1. La date de réception, du 26 juillet 1583, portée au dos de cette lettre, s’accorde bien avec les faits de la lettre suivante, datée du 19.