Recueil général et complet des fabliaux des 13e et 14e siècles/XXXVII
XXXVII
LE DIT DES MARCHÉANS
uiconques veut bien rimoier,
Il doit avant estudier
A bone matire trouver
Si qu’il ne soit au recorder
De nului blasmez ne repris,
Et por ce me sui entremis
De fere .I. dit dont j’ai matiere.
Diex le me doinst en tel maniere
Fere qu’il puisse à chascun plere.
Des Marchéanz vous vueil retrere
.I. dit novel, qui n’est pas granz.
Je di c’on doit les marchéanz
Deseur toute gent honorer ;
Quar il vont par terre et par mer
Por querre laine et vair et gris.
Les autres revont outre mer
Por avoir de pois achater,
Poivre, ou canele, ou garingal.
Diex gart toz marchéanz de mal
Que nous en amendons sovent.
Sainte Yglise premierement
Fu par Marchéanz establie,
Et sachiez que Chevalerie
Doivent Marchéanz tenir chiers
Qu’il amainent les bons destriers
A Laingni, à Bar, à Provins.
Si i a marchéanz de vins,
De blé, de sel et de harenc,
Et de soie, et d’or et d’argent,
Et de pierres qui bones sont.
Marchéanz vont par tout le mont
Diverses choses achater.
Quant vienent de marchéander
Il font mesoner lor mesons,
Et mandent plastriers et maçons,
Et couvréors et charpentiers ;
Quant ont fet mesons et celiers,
Feste font de lor voisinage ;
Puis en vont en pèlerinage
Ou à saint Jaque ou à saint Gile,
Et, quant reviennent en lor vile,
Lor fames font grant joie d’els.
Et mandent les menesterels ;
L’uns[2] tabore, l’autre vièle ;
L’autres redist chançon novele,
Et puis, quant la feste est faillie,
Si revont en marchéandie,
Li .I. en vont en Engleterre
Laines et cuirs et bacons querre ;
Li autre revont en Espaingne,
Et tels i a vont en Bretaingne
Bues et pors, vaches achater,
Et penssent de marchéander
Et reviennent de toz pais
Les bons marchéanz à Paris
Por la mercerie achater,
Et sevent moult bien demander
Et Troussevache et Quiquenpoist.
Or escoutez, si ne vous poist :
Iluec pueent il bien trover
Toutes choses à achater
Qui à la mercerie apent,
L’or empaillolé et l’argent,
Corroies de soie, aumosnieres,
Et joiaus de maintes manières,
Cuevrechiefz crespés, melequins,
Pailes ouvrez, riches et fins,
Guimples, fresiaus, coutiaus d’yvuire,
Et maint riche joiel trefuire.
Et riches croces à evesques,
A abez et à archevesques,
Crucefiz et ymagerie
D’argent et d’yvuire entaillie.
Les joiaus d’argent et de soie
Et de fin or i trueve l’on.
Des autres marchéans diron.
Il i a marchéanz de dras,
Et de toile et de chanevas,
De basane et de cordouan,
De cire, d’alun, de safran,
De dras dorez et de cendaus.
Si a marchéanz de metaus
Que l’on redoit forment amer.
Il i a marchéanz de fer,
Et si i a, que je n’oublie,
Marchéanz de peleterie,
D’ermine, de vair et de gris.
De piaus d’aigniaus et de brebis,
De poisson frès et de salé,
De fain et d’avaine et de blé,
De gaude et de waide por taindre ;
Des marchéanz ne me vueil faindre.
Il i a marchéanz de pion,
Et de busches et de charbon,
D’estain, de cuivre et de métal,
D’orfaverie et de cristal.
De madré et de fust et de coivre ;
Si i a marchéanz de voirre.
Encor n’ai pas tout devisé.
Marchéanz i a de filé ;
Si a marchéans de forages.
De sauvagine et de poulages.
Il i a marchéanz de fruit,
Naviaus et poriaus et letues,
De faucons, d’ostors et de grues ;
Et marchéanz de freperie,
Et de chanvre et de corderie,
Et de sarges et de tapis,
Et de ratoires à soris ;
Si i a marchéanz de lin,
De mueles de fer de molin,
De haces et de bernagoes.
De peles, de pis et de hoes.
Hotes et vanz et escueles,
Et de gates et de foisseles,
De martiaus, d’englumes, d’acier.
Diex gart marchéanz d’encombrier,
Chandeliers, potiers, lormerie,
Marchéanz de féronerie,
De seles, d’estriers, de poitraus,
De charretes et de borriaus.
Il i a marchéanz de nois.
De feves, de veces, de pois.
De siu[3], d’oint, de miel et de sain,
De chandoile et de peresin.
Ne le tenez mie à eschar :
Li bouchier si vendent la char,
Et li poissonier li poisson.
Marchéanz d’uile et de coton
Et de gingembras d’Alixandre,
De jaspe et de cristal et d’ambre
Diex soushauce Marchéandie
Et gart marchéanz d’encombrier.
Moult ont paine por gaaignier,
Et si sont moult sovent pelez,
Mes lor biens foisonent, adès
Que Dame Diex sa grace i met.
A tant de rimer me demet.
Que Jhesucriz, li fîlz Marie,
Gart Marchéanz de vilonie
Et lor doinst si marchéander
Qu’en paradis puissent aler,
Et les marchéandes aussi
N’i met Phelippot en oubli.
A tant vueil ma rime finer ;
Si vueil por marchéanz ourer.
Diex gart Marchéans d’anemis,
Et de tonoirre et de peris[4] ;
Et des larrons, Diex, les gardez
Que il ne soient desrobez,
Et d’encontre de fol et d’yvre
Soient tuit Marchéant delivre,
Et de la tormente de mer
Si qu’à droit port puissent aler,
Et il les deffende du dé
Qui maintes foiz m’a desrobé ;
Encor ne sui pas enrobez,
Quar par le dé sui desrobez ;
Se Dieu plest, je m’enroberai
Et aus Marchéanz conterai
Qu’il me donront de lor argent.
Que Jhesucrist, li filz Marie,
Doinst aux Marchéanz bone vie.