Ronsard - Œuvres, Buon, 1587/Si i’aime depuis n’aguiere
I i’aime depuis naguiere
Vne belle chambriere,
Hé, qui m’oſeroit blaſmer
De ſi baſſement aimer ?
Non, l’amour n’eſt point vilaine
Que maint braue Capitaine,
Maint Philoſophe & maint Roy
A trouué digne de ſoy.
Hercule dont l’honneur vole
Au Ciel aima bien Iole,
Qui priſonniere dontoit
Celuy qui ſon maiſtre eſtoit.
Achille l’effroy de Troye,
De Briſeïs fut la proye,
Dont ſi bien il s’eſchaufa
Que ſerue elle en trionfa.
Ajax eut pour ſa maiſtreſſe
Sa priſonniere Tecmeſſe,
Bien qu’il ſecouaſt au bras
Vn bouclier à ſept rebras.
Agamemnon ſe vit prendre
De ſa captiue Caſſandre,
Qui ſentit plus d’aiſe au cœur
D’eſtre veincu que veinqueur.
Le petit Amour veut eſtre
Touſiours des plus grands le maiſtre,
Et iamais il n’a eſté
Compagnon de maieſté.
A quoy diroy-ie l’hiſtoire
De Iupiter qui fait gloire
De ſe veſtir d’vn oiſeau,
D’vn Satyre & d’vn toreau,
Pour abuſer nos femelles ?
Et bien que les immortelles
Soient à ſon commandement,
Il veut aimer baſſement.
L’amour des riches Princeſſes
Eſt vn maſque de triſteſſes :
Qui veut auoir ſes eſbas,
Il faut aimer en lieu bas.
Quant à moy ie laiſſe dire
Ceux qui ſont prompts à meſdire,
Ie ne veux laiſſer pour eux
En bas lieu d’eſtre amoureux.