Rymes/Si descharger je veulx ma fantasie

Pernette du Guillet

Si descharger je veulx ma fantasie

Rymes, Tournes, 1545 (p. 37).

Si descharger je veulx ma fantasie
Du mal, que j’ay, & qui me presse fort,
On me dira, que c’est la jalousie
(Je le sçay bien) qui faict sur moy effort.
Mais qui pourroit estre en propos si fort,
Et d’argumentz si vivement pourveu,
Que ce, que j’ay de mes propres yeulx veu,
Soit une folle imagination,
Il feit accroire a mon sens despourveu ?
Il me feroit grand’ consolation.