Car vous ne l’aréz ja a nul jour de vo vie.
Refusee vous est de toutte sa lingnie
Et dou roy enssement qui l’a engenuie,
Et la puchielle ossi celle cose detrie,
Car elle ne vous aynme unne ponme pourie. »
Quant Garsillez l’oÿ, tous li sans li fremie ;
Adont entra li rois en telle jalouzie,
Et, quant il pot parler, si dist a vois serie :
« Signeur », che dist li rois, « par me chevalerie,
Li rois Ostes a fait moult tresgrande folie ;
Bien em polra morir ains l’anee acomplie.
Or semonnéz mes os et me grant baronnie,
A Ronme m’en yray, celle chité garnie ;
Ja mais n’ariesteray, si l’aray assegie. »
Enssi disoit li rois, con jel vous segnefie.
En la chité de Ronme en ala mainte espie,
Au roy Ostes li preus ont la gherre nonchie.
Li boins rois a mandé sa gent de Ronmenie
Et pourvoit ses chastiaus de bonne artillerie
Et de pain et de char et de boin vin sur lie.
Or est par tout le gent durement esmarie,
Pour la gherre mortelle li uns brait, l’aultrez crie ;
Et dist li uns a l’autre : « Douche Vierge Marie,
Con veschi grant pité et grant diaublerie,
Quant pour unne puchielle est enssi conmenchie
Unne gherre mortelle, plainne de felonnie !
Mauditte soit li heure quant elle fu nourrie ! »
Enssi par le paÿs la noise conmenchoit
Pour la gherre mortelle qui avenir devoit.
Cascuns moult durement Flourenche maudissoit
Et dient que par lui grant mesquief avenroit,
- ↑
612 detriie — 623 conme je le — 630 li aultrez — 631 disent li — 632 Conme ; grande d. — 635 nouurie.
