Mais ne savoient mie conment li chose yroit.
Signeur, a yche tamps que ceste oevre couroit
Millez et Esmeréz, ou biaus enffans avoit,
S’estoient departi de Hongrie tout droit,
Pour che que leur parastre durement les hayoit,
Mais li enffant aloient a moult noble conroit,
A loy de gentil honme cascuns se maintenoit
Et en moult biel estat et en moult biel aroit ;
Bien samblent gentil honme qui aler les veoit ;
Cascuns pour aventure trouver moult se penoit.
Quant il oÿrent dire qu’a Ronme gherre avoit
Et que li rois Gharssilles assegier le venroit,
Adont leur prist volente de aller la endroit.
Esmeréz, li mainsnéz, son frere en appielloit :
« Milles », dist Esmeréz, qui moult tresbiaus estoit,
« Je croy, mon enssiant, que boin aller feroit
En la chité de Ronme, car recheüx seroit
Dou riche empereour li miens corps orendroit,
Et, s’il y avoit gherre qui honneur nous feroit,
Emprendroit l’aventure, si qu’aventurez doit. »
Et Millez respondi que volentiers yroit ;
Mys se sont au chemin a forche et a exploit.
Mylles et Esmeréz, qui furent biel enfant,
Se sont mis au chemin enviers Ronme le grant,
A quatorze escuiiers aloient chevauchant,
Car il n’aloient mie a ghuise de truant,
Mais a loy de vassal et de prinche poissant.
Tant sont allé li frere dont je vous voy parlant
Qu’a Ronme sont entré droit a prime sonnant ;
À un moult riche hostel s’allerent hierbegant.
- ↑ 662 M manque — 669 se allerent.
641 cest o. — 647 moult (?) bien estat — 648 Biel — 650 qua roynne — 657 empereur ; orendroit manque — 658 se il — 659 Em prendre
