As chevaus sont couru et varlet et siergant,
Puis les vont vistement as estables menant.
Dont vont li damoisiaux vistement deshouzant ;
Il demandent a l’oste c’on aloit la disant
De gherre ne de paix, moult en vont demandant.
« Signeurs », che dist li hostes, « par Dieu le royamand,
Il appert chi a val unne gherre si grant
C’oncques telle ne fu en ce monde apparant
Dès le tamps Alixandres, le noble combattant ;
Car li fors rois Gharssilles va ses os assamblant,
De cha mer sont passet, che va on recordant.
Li gentieus empererez va saudoïiers mandant,
Qui les voelt recépvoir ; il a a son conmand
Et pain et char et vin et or et argent tant
Qu’il appiertient a lui et a son couvenant.
— Sire », dist Esmeréz, « or ne m’aléz chelant,
Mais dittes moy pour quoy, s’il vous vient a conmand,
Geste gherre s’esmut c’on va chi attendant.
— Et je le vous diray », dist li hostes esrant,
« C’est pour la fille au roy, au corps gent advenant,
Florenche le courtoise, u tout bien sont manant,
La plus bielle qui soit jusques en Orient.
Je croy, depuis que Dieus nasqui en Bethleen
Et qu’il fu mis en crois pour nous yestre gharant,
Ne fu telle puchielle ne de si biel samblant,
Et, avoecq che qu’est bielle, elle a le coer sachant
Et dou cours des estoilles et dou solleil luizant ;
De touttes maladies va elle gharissant.
Il a biautet, bonté et de sens en li tant
C’oncques n’ot son pareil en che siecle vivant. »
Quant Esmeréz l’oÿ, moult le va ghoullousant,
673 al hostel — 677 telles — 678 Despuis — 680 cha le — 684 Le premier a manque — 685 ne machelez ch. — 687 Mais c. gh. se sumalt (?) conme — 690 sont demorant — 693 Et que il ; nous serons.
