— Frerez », che dist li bers, « nous avons dit ainssi
Qu’apriès le grande gherre et le pesant estri
Que nous avons Gharssille matté et desconffy
Ou ochis en battaille ou mis a no mierchi.
— Frerez », che dist Millons, « or serons nous hardi,
Et je vous ayderay o riche brancq fourbi,
Car, se vous avéz bien, jen sui trestous joly,
Car nous devons bien yestre et loyaus et amy,
Et, se li nos parastez estoit finés ossi,
Je tenroie Hongrie, le royaulme garny ;
Enssi seroi je rois, se Dieus l’a conssenty,
Et vous un empererez de royaulme agenssi.
Ne sera rois ne comtez, quant il sera ainssi,
Qui puist avoir pooir ne sur vous ne sur my ;
Loéz en soit li Sirez qui pour nous mort souffry ! »
Puis a dit coiement, que nuls ne l’entendi :
« Se je puis esploittier, anschois mois et demy
Je le vous retauray ; point ne serons amy. »
Or furent li doy frere en la chambre a baudour ;
Li uns moustroit samblant felon et traÿtour.
Anbedoy sont venu ou hault palais maiour,
Li comte et li baron leur sont venut autour
Et au ber Esmeret portoient grant honnour,
Pour che qu’on en devoit faire l’empereour.
A table sont assis a loy de poingneour
Et apriès le disner alerent sans demour
Flourence viseter, qui fresce ot le coullour,
Qu’em veïr Esmeret prendoit douche savour ;
Car la bielle l’amoiit de tresloyal amour.
De regars amoureus servirent moult le jour ;
Bien s’en pierchulpt Millons, qui fu en grant esrour,
- ↑ 1507 habaudour — 1512 que on — 1519 grant manque.
1491 a. agharssillez — 1506 seront
