paroles que je pensay estre utiles a mon dessein.
Mr le duc de Lorraine estoit prince timide et irresolu, quy s’estonna d’abord de ma commission, et plus encores de ma proposition, et se persuada facilement que quantité de trouppes françoises a pied et a cheval, quy estoint venues border sa frontiere sur le sujet de la mort arrivée en ce temps là du dernier duc de Cleves[1], y estoint mises a dessein de l’attaquer, en cas qu’il ne respondit conformement aux intentions du roy. Il me demanda sy le roy m’avoit donné cet ordre de luy parler, en partant d’aupres de luy, ou s’il me l’avoit envoyé depuis mon arrivée en Lorraine ; et luy ayant dit que j’estois venu expres, despesché du roy, quy m’avoit luy mesme donné mon instruction, et voulu escrire de sa propre main la lettre que je luy avois apportée, affin que cette negociation ne fut esventée ny connue que quand il seroit temps, et qu’il m’avoit asseuré de n’en avoir fait aucune part a ses ministres, il me dit la dessus qu’il s’estonnoit bien que j’eusse esté trois semaines en Lorraine avant que de luy faire cette ouverture, et qu’il croyoit que je l’avois supersedée[2] a dessein de faire venir loger toutes ces trouppes en son voysinage avant que de luy parler.
Je m’aperçeus bien qu’il avoit de grands ombrages, et pour le remettre, je luy respondis lors que les mesmes raysons quy avoint convié le roy de ne par-
