grecque venoit a cause de moy ; puis les soirées et les nuits m’estoint belles. Nous fismes forces ballets, et entre autres celuy de la Serenade, auquel la reine nous receut, en la salle haute, sy somptueusement : nous l’allasmes, apres, danser a l’hostel de Condé.
Mr le Prince fit un festin et une course de bagues en suitte, ou toute la court des hommes fut priée, hormis moy, que la reine, en recompense, retint pres d’elle a jouer avesques peu de dames, laquelle, expres, ne se voulut point faire voir ce jour la, pour ne montrer point sa court deserte, a cause que tout le monde estoit a l’hostel de Condé. Il se fit un bal deux jours apres a l’hostel de Longueville, ou je fus prié de me trouver, et la reine, par despit, me dit que, puis qu’elle m’avoit diverty lors que je n’avois point esté prié cheux Mr le Prince, il estoit bien raisonnable que je demeurasse pres d’elle lors qu’une feste se faisoit contre la porte du Louvre, ou tout le monde estoit prié, hormis elle et madame la princesse de Conty, de sorte que je demeuray a jouer tout le soir avec elle, dont je fus bien brouillé ailleurs.
Sur ce, le caresme arriva, auquel, le premier jeudy au soir, 21me de fevrier, j’eus une bonne fortune.
Mars. — Je m’en allay, a quelques jours de là, voir le marquis d’Ancres, quy fut quelque temps a Amiens, faisant le malcontent[1]. J’en revins au bout de cinq jours, et allasmes incontinent apres Paques (avril) a Monceaux ou nous passions bien le temps.
- ↑ Concini était alors lieutenant-général au gouvernement de Picardie.
