a Brisac, sous l’esperance d’y estre receu et de se faire chef de l’armée precedemment commandée par le duc Bernhard de Saxe Weimarch, attendu qu'elle avoit esté destinée par le roy de Suede et les princes protestans d’Allemaigne pour servir dans les quattre cercles dont les electeurs palatins sont chefs ; et estant reconnu electeur par ledit roy et lesdits princes, il pretendoit de droit cette armée estre sous sa charge et son commandement. Le roy fut averty de son passage et le fit arrester audit Saint Pierre le Moustier, puis en suitte conduire au chasteau de Nevers.
Le roy ordonna Mr le comte de Harcourt son lieutenant general en Italie a la place de Mr de Longueville qu'il en retira pour luy donner le commandement de l’armée que souloit commander Mr de Weimarch en Allemaigne, et de Mrs le cardinal de la Vallette et comte de Candale quy tous deux estoint morts en Italie. Ledit cardinal possedoit soissante et dix mille escus de rente tant en l’archevesché de Bordeaux qu’en quinse abbaïes quy furent lors toutes distribuées a des particuliers. Il estoit pareillement gouverneur de la ville de Mets et du païs Messin : le roy donna ce gouvernement au sieur de Lambert quy a esté longuement mon domestique, et quy estoit lors mareschal de camp dans son armée et gouverneur de la Capelle en Picardie ; ce gouvernement fut donné au sieur de Roquepine[1] quy commandoit a Mets sous le feu cardinal de la Vallette. Ce mesme mois[2] se fit l’accommodement pour Brisac quy reconnut le
