Cette page a été validée par deux contributeurs.
58
le jeu de saint nicolas
Puis je tous ches sakier a mi ?
Chi a assés bele couvee.
rasoirs
Pinchedé, je prenç me levee,
Que vous orains me promesistes,
Et mout bien en couvent mesistes
Que che seroit au premier gieu.
pincedés
Hé ! C’as tu dit, anemis Dieu ?
Ceste levee vaut cent livres !
Cuidas tu dont que je fusse ivres
Quant le levee te promis ?
Che fu au jeu de pairesis,
Quant nous jouames au vin croistre.
rasoirs
Pinchedé, or du bien escroistre !
Je ne t’en donroie deus oés.
pincedés
Rasoir, enn’est chou a vo oés ?
clikés
Oïl, voir ; che cuidiemes nous.
pincedés
Male leeche en aiés vous,
D’ensi nos deniers esciekier !
rasoirs
De canque il a seur l’eschekier
Seras tu ja mout tost seneuc.