Cette page a été validée par deux contributeurs.
66
le jeu de saint nicolas
Mais widiés me tost me maison,
Car n’ai cure de tel gaaing.
pincedés
Ostes, ja fustes vous compaing,
Puis que che vient au dire voir ;
Et du pechié et de l’avoir
Devés avoir droite parchon.
li tavreniers
Or hors, fil a putain, glouton !
Volés me vous blasme acueillir ?
Caingnet, va t’en escot cueillir,
Puis les met hors de mon ostel.
caignés
Or cha, Cliquet ! Il n’i a el,
Delivrés vous de ceste cape !
Ja n’iert sans noise ne sans frape
Hom qui si faite gent rechet.
clikés
Quans deniers doi jou ?
caignés
Cinc du vin et douze du prest.
Ou Pinchedés et Rasoirs est ?
Or laisse te cape pour tout.
clikés
Caignet, tu te fais mout estout.