« Naimes, dit Charlemaignes, tout ainssis fait sera. »
L’emperere de France tous cez barons manda.
Dans Richart le Norment et cex qui sont de là,
Salemons de Bretagne que mont prodome i a,
Galerans et Huon chascuns grans gens mena ;
Chascuns prodons i vint te pooir qu’il a.
Mez Aimes n’i vint mie qui Dordonne garda,
Ne Regnaus ne ciz freres, car lor oncle aidera.
Quant l’ost fut assemblez, mont tres grans gens i a ;
Ains mais por .i. seul homme tel [ost] ne s’asembla.
La version M-Metz (et par conséquent la prose) se sépare au songe. Récit d’après M qui abrège. Je l’imprime jusqu’à la querelle de Renaud et du neveu du roi.
L’empereur de Franche ariere retourna,
Dedens son grant palez le bon roi en entra.
Quant il vit les barons, si les aresonna,
« Barons, dist Kallemaines, qui me conseillera ?
De Lohier me merveil qu’il ne revient de là.
Ennuit me fu avis, si comme il ajourna,
C’une foudre vermeille de lasus devala,
Si caoit sus Lohier, si que tout l’esmia ;
Et le duc d’Aigremont aprez chen revint là ;
A son branc trestout nu la teste li coupa,
Mais se il le m’a mort, moult malement me va.
Jamez jour le mien corps nul bien ne li voudra. »
« Sire, chen dist Dunaimez, ja ichen n’avendra. »
Kalles li emperere fu forment aïré
Pour l’amour de son fis que il avoit amé,
Tout pour le felon songe que il ot avisé.
En chen qu’il se complaint et qu’il s’est, dementé,
Estez vous .i. mesage pongnant tout abrievé,
Entrez est ou palez, le roi a salué :
« Damedieu vous saut, sire, qui en crois fu pené.
Je revieng d’Aigremont dolent et aïré.
Kalles, vous fustez fol et plain d’iniquité
Quant au duc envoiastez le treü demander :
Vostre chier fils Loïs en a esté tué.
La teste li coupa à son branc acheré
Et vostre home i sunt tuit et mort et afolé,
Fors que moi et .x. autrez en sommez escapé
Qui vostre fix aportent sus .i. cheval levei. »
