Page:Castets - La Chanson des quatre fils Aymon, 1909.djvu/1004

976

appendice

Kallemaines l’oï, à poi n’est forsené. »
30« Hé ! Dex, chen dist le roi, molt m’avez avilé.
La mort me donnez, sire, se il vous vient à gré. »
Dunaimez de Baviere l’avoit reconforté.
« Barons, dist Kallemaines, ales, si vous hastes.
Avec moi là dehors avec mon fil vendres
35Que le duc m’a ochis, dont je sui aïrés. »
Kalles li emperere se parti de Paris
Et avec li dus Naimez et Ogier le hardis.
A .ii. lieues d’ileuc, ainsi com j’ai apris,
A encontré son fix Kalles o le fier vis.
40Quant Kalles l’a veü, n’i a ne gieu ne ris.
« Biau fix, dist Kallemaines, moult estiez gentis.
James jour ne mourra homme de si grant pris. »
Grand duel ala menant Kallemaine o fier vis.
Naymon le reconforte et l’ardenois Tierris ;
45Par les bras l’enmenerent li baron segnoris.
A S. Germain des Prés fu le cors sevelis
Et oins et enbasmez et gentement servis.
Or vous leiron ichi de Kallon au fier vis ;
Si diron de Aymon et de Renaut son fix
50Qui erent à Paris où lor ostel fu pris.
« Segnors, chen dist Aymon, or oiez ma reson,
Aalart et Guichart et vous, Renaut, par non.
Kallemaine est irez, que moult bien le savon ;
Son fix a mort mon frere, le duc Buef d’Aigremont.
55Kalles ira sus lui à coite d’esperon.
Nous n’iron pas sus lui, par le cors S. Symon ;
Ains monton as chevax et si nous enfuion.
Se Kalles li veut guerre, moult bien li aideron. »
Le duc s’est escriez : « Montez tuit de randon. »
60Et il si firent lors, n’i font demoureson.
De Paris sunt issus à coite d’esperon.
Des journeez qu’il font, ne fes acontoison.
Et le duc et si fil en vindrent à Dordon.
Quant la dame les voit, ses a mis à reson :
65« Sire, bien vegniez vous à Dieu beneïchon !
Est Renaus, mon chier fix, chevalier à bandon ? »
« Oïl, ma douce dame, le gentil hons respont.
Adoubez nous a tous l’emperere Kallon.
Si home devenimez, feeulté li devon,
70Mez je dout durement qu’encor nel courouchon. »
« Renaus, chen dist la dame, vous ferez que bricon. »