Et si vivre en ce siecle que quant treapasserons,
Nous octroye sa gloire et fache vray pardons.
Or faites pais, seigneurs, ne faites cris ne sons,
Et je vous chanteray une bonne chanssons ;
Oncque melieur n’oïstez, bien dire le puet hons,
Car c’est des vaillans hoirs du preux contes Doons,
Cil qu’on dist de Mayence, qui tant fut vaillans hons
D’un de ces .xii. fieulx, qu’on appella Aymons,
Enssi .iiii. biaus freres des quelz orres les noms :
Regnaut fu le premier[1], Alart (fu) le seconds,
Et Guichars et Richars aussi furent les noms.
Richart fu le plus fier des .iiii. filz Aymons
Aussi que en l’istoire tout par tout le trouvons.
Bien aparut es guerres qu’orent les enfanssons,
Aussi que si aprez nous vous recorderons.
Seigneurs, or faites pais et veuillies escouter.
Des .iii. filz Aymon je vous voudray conter
De leur commenchement jusques au definer,
Si comme il guerroyerent Charlemaine le ber
Pour la mort Bertoulet que Regnaut voult tuer ;
Comment grant povreté leur convint endurer
Ens es fores d’Ardanne ; et vourray recorder
Com(me) vinrent a Dordonne a leur mere parler
Et au bon duc Aymon qui les voult engenrer ;
Comment Maugis y vint pour eulx reconforter ;
Puis se vouldrent partir et en Gascongnie aler
Servir au roy Yon qui depuis voult donner
Sa suer en mariage a Regnault le bon ber
Clarice ou …… voult en lui engenrer
Deux hoirs malles que Dieux voult de p… honnourer
C’est Aymon et Yvon, on les puest bien nommer.
Et puis recorderay et vouray deviser
Comment Karle les fist de Gascongnie semer,
Comment reurent leur pais, com Regnault passa mer
Iherusalem conquist, comment voult raporter
Les trois clous, la couronne dont Dieu du trosne cler
Fust sà jus couronnés et ses membres fichier
- ↑ Dans les versions françaises anciennes, c’est Alard qui est l’aîné.
