Il apela ses freres, si les a areiniés ;
Owec lui les enmaine et serrés et rengiés ;
Par la fause poterne s’en est jus repairiés.
Dex ! ci croist à Renaut une paines si griés.
Renaus a la poterne soavet avalée[1]
Entre lui et ses freres de maisnie privée
Et issent del chastel coiement à celée,
Et la vile fu arse et la tor embrasée.
La gent qui fu dedans, fu tote à mal tornée ;
Tot sunt mort et ocis, n’i a nule celée.
Li escuier le fissent come gent honorée ;
A la fause poterne fissent lor aünée[2]
Et ont si bien la porte desfendue et gardée,
Onques nus n’i entra, n’ait la teste copée.
Et Hervix li traïtres a sa gent asemblée ;
Tot droit al sosterrin l’en a o lui menée.
Grans fu li chapleïs, merveilleus à l’entrée.
Renaus li fils Aymon a la noise escoutée ;
Il a dit à ses freres : « Coardisse est provée
Que nos nos enfuions tapi, en recelée.
Nostre gent se combat, je l’ai bien escoutée ;
Se ele i muert sens nos, grans iert la reprovée.
Mais car le faisons ore, comme gent honorée,
Que chascun les secoure au tranchant de l’espée. »
Et cil li respondirent : « Si soit com vos agrée. »
A iceste parole ont la roche montée ;
Tot droit al sousterrin vindrent à la meslée.
Là peüst on veoir doner tante colée
Et tant pié et tant poing, tante teste copée.
Desor les traïtors est la perte tornée.
Aalars li cortois a la porte fermée,
Et la barre avant traite et par devant serrée.[3]