[Or fu leans Hervix el chastel enserrés[1]
Entre lui et ses hommes par molt grant foletés].
Li fil Aymon le fierent, chascuns tos abrivés.[2]
Là peüssies veoir tant [ruiste] cos donés.[3]
Tant roide lance fraindre, tans escus estroés,
Tans haubert jaserans derous et despanés
Et jesir par ces rues tans mors et tant navrés.
Tot sunt mort et ocis, n’en est riens eschapés,
Fors Hervix, lui dissieme, qui s’est à eus livrés ;
Mais de çou fist Renaus que preus et que senés
Qu’il n’en vost noiant estre en lonc charroi entrés.
El plus haut del rochier en [sunt] o lui menés.[4]
Unes forches fist faire, forment s’en est hastés,
Les traïtors i pent contremont lés a lés
Et l’ensaigne de joste dont Charles fu irés.
Adonques fu Hervix en la place menés,
Et .iiii. bon destrier, chascuns fu enselés.
Le traïtor ont pris, si fu si acesmés
Com vos pores oïr, se croire me voles,
Et as piés et as mains ont grans saïns noés.
As .iiii. membres fu et liés et serrés.
Les .iiii. destriers ont maintenant atelés ;
Sor chascuns des chevaus est .i. vales montés.
Tos .iiii. ont les destriers brochiés par les costés ;
Molt fu en petit d’eure illuec deceplinés.
Issi fu li traïtres ocis et desmembrés.
Le marrien des arsis ont trestos asembrés.
S’en fissent .i. ré faire qui bien fu alumés.
Là fu ars li traïtres et en poldre ventés.
L’empereres le vit, si l’en pesa assés.
« Hé Dex ! dist Charlemaignes, qui en crois fu penés,
Con sui par ces glotons honis et vergondés.
- ↑ 2716-2717. L Renaus fu o Hervix el chastel enserrés Entre lui et ses homes seulement enserrés. A M Or fu leans Hervis ou chastel ensserrés Entre lui et ses homes par mont grant foleté. C Or fu Helviaus laienz el chastel enfermés Entre lui et ses homes par moult grant foletez.
- ↑ 2718 A refierent. C i vont courant tot.
- ↑ 2719 L riche. A C M ruiste.
- ↑ 2727 L est. A les a o lui. Manque à C. Il s’agit des compagnons d’Hervieus.
