Adonc fu plus isniaus que devant n’iert asses.
Seignor, ce sachies vos, que ce fu verités :
O tous les .ii. barons dont il iert encombrés,
Fist Renaus .iiii. jostes as chevaliers armés.
Or sunt li fil Aymon durement entrepris
Là où Renaus torna contre ses anemis[1].
Ha Dex ! com fu Baiars et fors et poestis !
Quant ot les .ii. barons armés et fervestis,
Fist Renaus .iiii. jostes, com bons vasaus eslis ;
A chascune lor a .i. chevalier ocis.
Es vos par la bataille Hermenfroi de Paris ;
Cil iert maistres veneres au roi de Saint-Denis,
Et sist sor .i. cheval qui vint de Mont Senis.
En present fu à Charle l’empereor tramis ;
Ne cuit k’eüst meillor en trestot le païs.
Hermenfrois fu l’autr’ier de ceus de l’ost partis ;
Por .i. mesage dire fu à Aymon tramis.
Il broche le destrier, ne fu mie esbahis,
Et voit les fius Aymon, si s’escria à haus cris ;
« Si m’aïst Dex, gloton, tot seres mort et pris.
Je vos rendrai à Charle, le bon roi au fier vis. »
Et va ferir Renaut devant, sor l’escu bis,
Et Renaus feri lui com hom maltalentis,
Et l’escu li perça et le hauberc treslis.
Le cuer qu’il ot el ventre, li a en .ii. partis.
Tant com hante li dure, l’abat mort el larris.
Par les reines à or a le bon destrier pris.
Aalars li cortois est es arçons saillis,
De la joie qu’il ot vait ferir Anseïs ;
Mort l’abat del cheval de les .i. plaiseïs ;
Cil n’en levera mais ; estre i puet à tos dis.
Molt fu fors li estors et li abateïs,
Et Aymes les enchauce, li viels chenus floris.
Il escrie à ses homes : « Mar en ira .i. vis,
Car mort m’ont Ermenfroi que Charles m’ot tramis.
Molt en iert dolans Charles, li rois de Saint Denis. »
- ↑ 3072 A B M donnent une leçon intéressante : Renaus siet el cheval, equiert ses anemis.
