Ja nus nes garira qu’il ne soient pendu.
Por çou vont en Ardane li fil Aymon tot nu ;
Quant il pluet et il vente et il greste menu,
Chascuns est sos .i. arbre, à son col son escu,
Lor hiaumes enroillés et lor espié molu,
Et li cheval desferrent, li lorain sunt rompu.
Renaus a maudit l’eure qu’il vit le jor venu
Que Looïs[1] perdi le chief desor le bu.
Forment lor anuia li yvers qui lons fu.
Ha Dex ! com desirroient que estés fust venu !
Or est estés venus, li ivers est passés,
Li soes tans les a durement amendés.
Li cheval peurent l’erbe ques a esvertués ;
Par içou ont lor cuers auques resvigorés ;
Et Renaus a ses freres auques bel apelés
Et Renier et Guion et Foucon le barbé.
« Seignor, ce dist Renaus, se vos plaist, entendes.
Molt avons en Ardane sofert grans povretés :
Ainc n’ot plus de mesaise nus hon de mere nés.
N’avons arme ne drap, tos les avons ussés ;
Velu somes et taint des vens et des orés.
Plus me poise de vos, voir que de moi ases.
Molt avons ces fores et ces grans bos gardés.
.vii. ans accomplis, n’en fu .i. fais portés.
Charles, nostre emperere, nos en doit savoir grés ;
Chascuns en devroit estre richement sodeés ;
Or [est][2] li tans venus, kit tant est desirrés ;
Trop ont nostre anemi en lonc sejor estés ;
.vii. [ans][3] que .i. seus n’en fu par nos grevés.
S’or avïons chevaus, sor coi fussons montés,
Or mais devroient estre traveilliés et penés.
Par icel saint Apostre c’on quiert, en Noiron prés,
Ja n’en ataindrai .i. qui ne soit decolés.
Ki bon conseil saura, por Deu me soit donés. »
« En la moie foi, sire, dist Aalars l’ainés,
