[Qui ne soit en chastel ou en tor enserés][1],
Tant par estoit Renaus cremus et redoutés.
Sovent a o ses freres les François revisdés,
Et o les .iii. [vassaus][2] de cui il iert amés.
Quant il vont en besoing, li .iii. sunt montés,
Et li .iii. vont à pié, qui les ars ont portés.
Et quant il ont les ewes et les maus pas trovés,
Dont montent il tot .vii. es chevaus desertés.
Baiars en porte .iiii. quant il est bien hastés.
Chascuns n’est mie el bos logiés ne através,
Mais de fos et de chaisnes est chascuns aombrés ;
Lor garnemens ont tous desrous et despanés ;
Tant orent as chars nues les blancs haubers portés
Que il furent plus noir k’arremens destemprés
Et si sunt plus velu ke n’est un ours betés.
Des bons estrius à or est li cuirs desorlés
Et li frain de lor seles porrissent as orés.
Reines firent de hars, de ceus trovent asses ;
S’en sunt lor estrivieres et lor chevaus çainglés.
Tant com issi lor va, sunt il bons eürés.
Tant com il pueent traire, fu molt grant la plantés.
Mais les cordes porrissent, si revient la chiertés.
Tant les avoit yvers souspris et abosmés,
A bien poi que il n’ont lor bons chevaus tués.
Onques Dex ne fist home ki de mere soit nés,
S’il veïst les barons, ne l’en preïst pités.
Tant ont li fil Aymon en Ardane esteü,
Que il i ont trestot lor bon esfors perdu,
Fors que .iii. chevalier qui lor sunt remasu ;
C’est Reniers et Guion et Fouques li chenu,
E cil se sunt tres bien aduré et tenu.
Il n’issent cele part qu’il ne soient veü ;
Maintenant lor comence et la chace et li hu.
Charles l’a comendé, bien est partout seü,
Que s’on les puet ataindre, que il soient tenu,
Et se on les retient, à lui soient rendu ;
