Son argent et son or a fait laiens porter ;
Plus de .xxx. somier en i a fait mener.
Puis fait li rois par l’ost et banir et crier :
Or soient tot seür, or porront recovrer.
Le grant tref Charlemaigne font contremont lever ;
Par desor le pomel font l’aigle d’or poser ;
Par devers Montauban en fist le chief torner.
Puis l’emporta Richars, li fius Aymon le ber,
Et si copa les cordes del Charlemaigne tref
Que li feste en chaï Charlon desor le nes.
Oliviers et Rollans issirent for del tref
Et dus Naimes de France et Torpins l’ordené.
Dant Girars l’Espanois a le rois apelé.[1]
« Sire, ce dist Girars, à moi en entendes.
Par la foi que vos doi, malvais conseil aves.
Gascoigne est molt fort terre et molt fait à doter.
Mandes le roi Yon de Gascoing[ne] le ber,[2]
Que vos iestes à force dedans sa terre entrés ;
Si aves awec vos trestous les .xii. pers,
Rollant et Olivier et des autres asses
Et bien .l. mile de chevaliers armés,
Entre les wiels chenus, les floris, les barbés
Qui donront les consaus es grans estors mellés.
Se il les fius Aymon ne vos fait delivrer
Et tos fors de Gascoigne conduire et amener,
S’il contre vos les osse .i. seul jor receter,
Vos li feres la barbe et les grenons plumer. »
« Par mon chief, dist li rois, bon conseil me dones ;[3]
Ensi sera il fait, com vos le me loes. »
Charles en apela Guinemart : « Ça venes.
El regne de Gascoigne vos pri que tost ales ;
- ↑ 5701 Dans M c’est Naymes qui conseille le roi en un très bref discours.
- ↑ 5705 L le rois... Gascoing.
- ↑ 5716 M Par mon chief, dist li rois, bon conseil me donnes.
.i. sien cousin apele qui ot nom Fouquerel.
Amis, dist l’empereur, à Toulouse en ires,
Au roi Y. de Gascongne de moie part dires
Que je sui en sa terre par moult grant ire entrés ;
Les fix Aimou me rende, s’iert à moi acordés
Ou je ne li lerroi castel ne fermetés.
Et il a respandu : Si soit com dit aves.
