Tant queres roi Yon que de vos soit trovés.
De moie part li dites, ja mar li celeres.
Ce que Girars a dit, que vos oï aves. »
« Sire, dist Guinemars, je li dirai asses. »
« Par mon chief, ce dist Charles, vos le m’afieres,
Que, por paor de mort, riens ne li celeres. »
Ou il vousist ou non, li covint afier.
Atant parti del roi, si s’est acheminés
Et trespasse les terres et les amples reinés.
Venus est à Toulouse, l’amirable cité.
Illuec trova Yon, le fort roi coroné,
Et .ii. m. chevaliers qui là sunt assamblé,
Et fait ces urs combattre et ses grans ors beter.
Chantent cil chanteor, vielent cil jogler,
Et fait soner ces tymbres, ces grailes ordener.
S’il se fait à .ii. pailes richement esventer
Por la chalor qu’est grans, qu’il ne puet endurer.
Atant est li mesages sus el palais montés.
Quant voit le roi Yon qui menoit tel fierté,
Li cuers li muert el ventre, si commence à trambler ;
D’une part se torna par dejoste .i. piler.
Illuec estut tos cois, qu’il n’osa mot soner,
Tant que en lui meïsmes se prist à porpenser
De çou que li rois Charles li ot fait afier,
Que por paor de mort n’i auroit mot [celé].[1]
Adonc reprit son cuer, si est avant passés ;
Dist au roi de Gascogne : « Biau sire, or entendes.
Cil dame Dex de gloire, qui maint en majesté,
Et forma ciel et terre, tot à sa volenté,
Cil beneïe Charles, le meillor coroné
Qui onques fust en terre n’en la crestienté.
« Sires, rois de Gascoigne, faites pais, si m’oes.
Je ne vos salu mie, ja mar le cuideres.
Par moi vos mande Charles, li riches coronés,
Qu’il est par vive force en vostre terre entrés.
Si a en sa compaigne trestos les .xii. pers,
Rollant et Olivier et des autres asses
Et bien .lx. mile de chevaliers armés.
- ↑ 5744 Sic B C. L soné.
