Qui nos doivent conduire el parfont bos plenier.
Se nos Baiart avons, qui tant fait à prisier,
Home ne doterons qui soit desos le ciel. »
« Je n’en ferai noiant, dist li rois, par mon chief ;
Car molt doute rois Charles vos cors et vo destriers,
Vos armes et vos freres, quant sunt apareillié.
J’en ai doné ostages, voiant .m. chevaliers,
Que n’i porteres armes ne n’i menres destrier.
Se n’est mie [li] regnes gastés ne essilliés,[1]
C’est de bien fait col frait, dont me sui traveilliés.
Je vos ai à Charlon acordés et paiés,
Et se vos nel voles graer et otroier,
Jamais jor de ma vie ne m’en orres plaidier. »
« Sire, ce dist Renaus, tot à vostre congié. »
Au plus tost que il pot avala le planchié.
Encontre ala sa fame, Clarise au cors legier,
Aallars et Guichars et Richars li proisiés.
Belement li demandent : « Con aves esploitié ?
Menromes nos Baiart, vostre corant destrier ? »
« Par Deu, ce dist Renaus, n’en puis avoir congié.
Li rois est molt preudom et loiaus chevaliers.
Il ne me traïroit por les membres tranchier.
Conduire nos fera à .vii. contes prisiés.
Cil sires me confunde, qui là sus maint el ciel,
Quant je ja mescrerai mon seignor droiturier. »
Et respondent si frere : « Atant l’avons laisié.
Puis que vos le voles, nos irons volentiers. »
Li fil Aymon monterent au palais princepel,[2]
Firent faire lor lit, si se vont reposser.
Li dus Renaus se colche et sa fame dales ;
De l’autre part si frere, qui molt font à loer.
Desi à lendemain que il fu ajorné,
Li dus Renaus s’esveille et choisi le clarté ;
Il a dit à ses freres : « Baron, car vos leves.
Se l’empereres est en Vaucolor entrés
Et il ne nos i trueve, saura nos ent mal gré. »
