S’irai à la desfense, si vos i aideron. »
« Hé Dex ! ce dist Renaus, tant par vaut .i. sols hom ! »
Qant Aallars l’oï, si ot molt grant tendror ;
Grant duel a de ses freres ki se demente[nt][1] molt.
Et Aallars s’escrie : « Ogier, que dites vos ?
J’ai eü grant fiance quant vos vi en l’estor.
Ja somes vos neveu, preis nos apartenom.
[Se tu nous lais morir, ce sera mesprison :
Reprochié te sera mais en tres toutes corts][2]. »
Quant Ogiers l’entendi, à poi de duel ne font,
Dont n’i vossist il estre por tot l’or de cest mont.
Il saut en Broiefort, en sa main .i. baston ;
A la roche s’en vint, poignant à esperon,
Et apela François et Normens et Bretons.
« Seignor, ales en sus, le giet à .i. baston.
Je parlerai as contes, savoir s’il se rend[r]ont[3].
Se prendre les poom, molt bon plait [fait][4] auron. »
Et cil li respondirent : « Vostre comant ferom.
Ogier de Danemarche, nos les vos comandom,
De par Charle de France, que nos ne les perdom. »
« Hé Dex ! dist li Danois, ainc n’amai traïson ;
Or ne comencerai, se Deu plaist et son nom. »
Venus est à la roche, s’apela les barons ;
Belement lor a dit, à molt basse raison :
« Seignor, franc chevalier, por Deu assees vos.
Reprenes vos alaines, mestier en aves molt.
Desfendes vos tosjors à force et à bandon ;
[Car, se Charles vos tient, ja n’ares raençon
Qu’il ne vos face pendre ou bruir en carbon][5].
Esforcier vos covient por salver vos honors :
Savoir se ja Maugis vos vendroit au secors. »
« Cousins, dist Aallars, tu en auras guerdon. »
« Voire, ce dist Renaus, se eschaper poom,
Page:Castets - La Chanson des quatre fils Aymon, 1909.djvu/526
Cette page a été validée par deux contributeurs.
498
les quatre fils aymon
