Ne vos auroit mestier, se nos tenoit Charlon,
Et hom qui çou atent, molt doit estre prodom ;
Molt se doit bien desfendre por avoir garison.
Aallart, socor nos, por cele passion
Que Dex soufri en terre por no redemption.
Ja ne somes nos mie ne Normant ne Breton ;
Ançois somes tot frere ; pres nos apertenon,
D’un pere et d’une mere et d’une nation. »
« Vos dites voir, biaus sire, dist Aallars li blons ;
Mais ne vos puis aidier, tant par sui anguissos,
Car à mort sui navrés, ja n’en escaperons. »
« Certes, ce dist Renaus, au cuer en ai dolor.
Tant com vos puise aidier, ne vos faudrai nul jor. »
Ki là veïst Renaut, le nobile baron,
Encarge[r] les grans pieres et le ruiste perron.[1]
Ne le levassent mie .v. vilain à besoing
Et Renaus les encarge à son col trestos sols,
Et cort par les desfenses entor et environ
Et desfent por ses freres et por lui à son tor.
Plus de .xx. en a mort, que ja ne veront jor,
De grant pieres cornues et de callaus roons ;
Par miliu de [sa boce saut le sanc de randon] ;[2]
Tant fu afebloiés k’il ert à genillon,
Qant l’ot veü Richars ki [j]ut sor le perron.[3]
Li vasaus est navrés, dont il est grant dolor.
La boele ot sortie sor l’ermin peliçon ;
Par la plaie li pert li foie et le pomon.
Il a levé le cief un petit contremont,
Et a dit à Renaut, à molt basse raison :
« Or me dites, Renaut, frere, aiderai je vos ? »
« Frere, ce dist Renaus, ja ne pories vos. »
« Si ferai, dist Richars, tant comme vif soion,
Or m’en trencies .i. pan de cest mie[n] siglaton,[4]
Si m’estraingies les flans entor et environ,
Page:Castets - La Chanson des quatre fils Aymon, 1909.djvu/525
Cette page a été validée par deux contributeurs.
497
les quatre fils aymon
