Puis li cria Renaus : « M’espée vos apresse.
Miels vos venist, ce cuit, encore as tentes estre. »
Quant Rollans l’entendi, si se prist à irestre.
Rollans, li niés Charlon, au corage gaillart,
A veü com Renaus ses grans cos li depart.
Se vengier ne se puet, ja se tenra por mat.
Il tint sa bone espée c’on claime Durendart ;
Renaut en va ferir del taillant, non del plat,
Amont parmi son helme ; molt i fist grant escart.
Les breimes et les flors contreval en abat,
Et l’escu de son col en .ii. moitiés li part.
Par derriere s’en torne li bons brans contreval ;
Le dossel del hauberc li tranch[e et met aval],[1]
Et le pan de derriere à l’espée emporta,
Et les .ii. esperons à fin or li trencha,
Durendal fiert en terre jusqu’al heut à esmal,
Puis li a dit Rollans : « Renaut, traies vos ça.
Vos parleres à moi ençois que none past.
Je t’ai bien repaié ce c’orains me prestas.
S’il ne te vient à gré, je l’amenderai ja.
Or somes des cops per, qui recommencera ? »
« Je, par foi, dist Renaus, dahait qui vos faudra.
Or ferrai je à certes ; primes feri à gas.
Jamais damissellages vers moi ne vos vaura. »
Or reviennent ensamble li nobile vasal ;
Il ne s’en fuient mie, ains prendent bon estal.
Ja i fust grant la perte, qu’il ne remansist ja,
Quant Maugis vint poignant le pendant d’un costal,
Aallars li ainsnés et Guichars li vasal,
Et .cccc. Gascon ; chascuns ot bon cheval.
Baiart li ont rendu et Renaus i monta.
D’autre part vint Ogiers cui molt entalenta ;
Estous, li fius Oedon, mie ne s’i cela,
Oliviers de Viane au corage loial ;
A Rollant sunt venu et li quens remonta.
Lors reviennent ensamble au chaple communal.
- ↑ 9212 L li trancha contreval. C’est répétition du vers précédent. Je prends la leçon de M. C li coupe et trait aval. B li ronpi et copa.
