Segnor, se la fussies dessos le pin reont,
Où Gascoing asemblerent à Rollant le baron.
Là ot tante hante fraite, tant escu à lion,
Tant hiaume esquartelé et tant hauberc desront,
Et tant bon chevalier abatu de l’arçon ;
Tant i est grans la noise, n’est se merveille non.
Rollans crie Monjoie à sa fiere raison.
« Où iestes vos alés, Renaut, li fius Aymon ?
Traions nos d’une part ; encor nos essaion,
Car encor ne set on qu’est vasaus ne qui non. »
« Sire, ce dist Renaus, cuer aves de baron.
Ves me ci en present, o tot mon confanon.
Mais se me voles croire, autrement le feron.
Vees, ci nos esgardent Norment et Borgoignon
Et Gascoing et mi frere qui de moi peor ont.
Ne nos lairont combatre, ne le nos soferront.
Rollant, tu as cheval, qui bien vaut .i. roion,
Et je si ai Baiart, k’il n’a meillor el mont.[1]
Car nos en tornons ores, brochant à esperon,
Si passons la riviere de desos Balençon,
El bois de la Serpente où antiv sunt li mont,
La valée parfonde et li brueilliuet reont ;
Là nos porrons combatre et ferir à bandon.
Illuec ne nos nuira nus hom qui soit el mont.
Si porra on savoir qui vaura miels de nos. »
« Certes, ce dist Rollans, Renaut, molt iestes prous,
Et je l’otroi issi ; ja ci ne remenron. »
Lors s’en tornent ensemble et muevent de randon,
Et François se destendent, broçant à esperon.
Ogiers et Oliviers et li quens Ydelon,
D’autre part Aallars et Guichars li baron,
Et Richars li vaillans et Maugis li larron.
Tant i fierent et chaplent, n’est se merveille non.
Oliviers prent Rollant et li ber Salemon ;
Si l’ont mené arriere ou il vossist ou non ;
- ↑ 9253 Michelant a pris un i pour une s par suite de l’habitude qu’a le scribe dans cette partie du ms. de prolonger sur la marge les traits verticaux des lettres à la première et à la dernière ligne de la colonne. V. sa note.
