Dame Deu reclama et la suie bonté.[1]
« Dame Dex, sire peres, me trairai je as trés,
Ou je atandrai tant que il soit ajorné ?
Je ne sai le quel faire, forment sui esgarés.
Se jes vais escrier là où sunt au soper,[2]
Il ocirront Maugis, ains qu’il soit ajorné.
Miels me valt tant atandre que l’en voie mener ;
Et lors le secorrai au branc d’acier letré. »
Or lairons de Renaut, le vasal aduré ;
Si dirons de Charlon, le franc roi coroné,
Ki apela Ogier et Torpin l’ordoné,
Et Namlon le [barbé] et l’Escot Gilemer ;[3]
Ydelon le baivier a o lui ajosté.
« Baron, dist Charlemaignes, à moi en entendes.
Faites moi sor cel mont unes forces lever
Où nous pendrons Maugis, le larron desfaé,
Que je voudrai destruire ains que voise souper.
Se nos l’aviens ore tot ensamble juré,
Nel porriens nos mie desi au jor garder. »
« Sire, ce dist dus Namles, se croire me voles,
Vos ne le pandres mie, qu’il vos iert reprové.
Renaus s’en gaberoit et Aallars li ber,
Et trestous li barnages qui en orroit parler,
Et diroient entr’eus li chevalier loé
Que ne l’osastes mie desi au jor garder.
Mais atandes le jor ; tant de jant i menes
Que se Renaus i vient, vos droit i maintenes
Et tres devant lor iols con larron le pandes. »
- ↑ 11461 B la soie.
- ↑ 11465 B Se les.
- ↑ 11472 L Namlon le Baivier. Mais au v. suivant l’on a aussi Ydelon le Baivier. Michelant corrige d’après C B Le bon duc Namelon. — Ici L écrit Namlon en toutes lettres, et Namles au v. 11502. L’abréviation est Na. Au vers 11556 l’on a Names en toutes lettres et plus loin encore. Je tâche de bien traduire ces abréviations successives. Dus Names a donné l’italien Dusnamo. Dunaime est un nom de famille porté encore aujourd’hui.
Les épithètes jointes au nom de Naimes sont dans ce passage : li barbés, 11512, le barbé, 11677, li cortois 11823 ; il est dit de France 11603, 11947, 12033.
