Ou il ierent tot cuite, ou g’irai reposer.
Namle, je vos claim quite et tous les .xii. pers
Del plege k’aves fait vers Charlon l’aduré.
Mais or face li rois ce qu’il a enpensé.[1]
Je ne voldroie pas qu’en fust vers vos irés[2]
Ne que vos en fussies de France desertés. »
Quant Charles l’a oï, à poi n’est forsenés.
« Par mon chief, dist li rois, point ne m’eschaperes. »
En trois paires de buies le fist Charles entrer
Et furent d’ambepars bien batu et rivé.
En .i. piler de chaisne les fait .iii. fois passer ;
En .i. grandisme tronc furent li coing fermé,
Et li charcan del col sunt grant enchaiené,
Et les moufles de fer li fait es mains fermer ;
Parmi toutes les ongles en fait le sanc voler.
« Maugis, ce dist li rois, or est pis, en non Dé. »
« Sire, ce dist Maugis, or m’aves enserré ;
Mais or vos di je bien, oiant tot vo barné,
Je verrai Montauban, ains qu’il soit ajorné. »
Comme Charles l’entent, à poi qu’il n’est dervés ;
Il a traite l’espée, vost li le chief coper ;
Mais Rollans li escrie : « Sire, merci, por Dé ! »
Et dus Namles de France et Torpins l’ordenés :
« Avoi, sire, font il, ja issi nel feres,
Car çou sera grans hontes, se issi l’ocies.
Ne deves mie croire tant sache fausetés.
Comment se porroit ore de vos mains eschaper ?
Par foi, s’il en eschape, ce sera par maufé. »
« Par mon chief, dist li rois, mainte fois m’a gabé. »
Desi à mienuit ont veillé [ens el tré][3]
Que il sunt de dormir durement agrevé.
Lors regarde Maugis tout contreval le tré,[4]
Et commence son charme qu’il ot par cuer fermé.[5]
Tot issi com il a son visage torné,
- ↑ 11584 Metz : tote sa volenté
- ↑ 11585 Metz : Ne voil plus que li rois soil vers vos aïrés.
- ↑ 11610 L en esté. B ens ou tref, M Desi au matinet ont veillié ens es trés. En effet on ne veille pas seulement dans la tente de l’empereur.
- ↑ 11612 Cf. Maugis d’Aigremont, v. 5761 sqq. et le ms. 764, f° 53, à la description des mss. des Fils Aymon.
- ↑ 11613 M un carne, qu’il ot ou cuer fremez.
