Que soloie mener, quant avoie largesce
De pain, de car, de vin, dont or ai tel destrece.
Las ! que porai je fere ? ne sé mais nule adrece
Dont nos aions vitaille ; or ne valt rien proece.[1]
Ce nos fait Charlemaignes par sa grande noblece. »
Là dedenz Montauban commença li tormenz.
N’i ot tant fort baron ki ne devenist lenz,
Que tot lor fu faillis painz et vinz et formenz.
« Por Deu, ce dit Renaus, molt nos va malement,
Quant nos n’avons vitaille à faire no talent. »
« Sire, dist la ducoise, qui l’ama durement,
Qu’ales vos dementant, por le cors saint Vincent ?
Cevalz avons corans, ce sai bien, plus de cent.
Ne sont pas tot mangié, jel sai à escient.
Por Deu, tuez en .i., sel manjons erranment.
S’en auront mi enfant por qu’ai le cuer dolent.[2]
.ii. jorz a ne maugierent, sel demandent sovent.
Lasse ! que devendrai ? trestoz li cuers me ment.[3]
A poi ke ne m’oci, si me va malement. »
Quans li dus l’entendi, molt grant pitié l’en prent.
Lors descendi Renaus tost et isnelement ;
Venus est à l’estable à .i. cheval, sel prent ;
Sel commande à tuer tost et [delivrement ;][4]
Et l’en si fist molt tost, sanz nul delaiement,
Et errant fu mis cuire, hastez fu durement.
Molt furent à malaise icil ki laienz sont.
Lor cevax font tuer, autre vitaille n’ont ;
Et tant com il [durerent], molt liement le font ;[5]
Mes tost furent mangié tuit li ceval gascon ;[6]
N’en i remest que .iiii. que esparegniés ont,
- ↑ 13314-13315 M Dont nous aions vitaille vaillissant une meiche. Dex ! où est or Maugis c’or ne set la destreiche Que nous a fet Kllon par sa trez grant nobleiche ?
- ↑ 13326 M pour qui le cuer mi ment.
- ↑ 13328 Cf. leçon de A à 13233 et M 13326. Ici M a me fent que Michelant imprime, sans raison suffisante, car M ne fait qu’éviter une répétition.
- ↑ 13333 Sic M. L répète isnelement.
- ↑ 13338 Sic M. L durent.
- ↑ 13339 M Mez tost furent failli que laiens grant gent sunt.
