L’autre feri d’un roc par itel randonée
Que il l’abati mort, sans brait et sans criée.
Donc [a pris un] aufin qui la teste ot dorée ;[1]
Si en feri un autre, l’arme s’en est alée ;[2]
Puis en gita telx trois en une randonée
De l’un feri .i. home qui gist gole baée,
L’autre vola au loing une grande volée,
Le tiers feri el vis delez la bare lée ;
Et li esches sunt gros, dont la teste ai crevée.
Sire, [quant ce veïsmes], par la Dame clamée,[3]
Donc tornasmes an fui[e], qui ains ains à huée ;[4]
Et il remist laienz, que n’i fust arestée ;[5]
Puis laissa Yvonet, la chambre a delivrée. ».[6]
Quant Renaus ot ces moz, ne set que devenir.
Tel duel a et tel ire, lo sanc cuide marrir ;[7]
Donc jura Dame Dex, par mervillex aïr,
Se hui n’a pes au roi, Richart fera morir,
Donc [corut] vers la tor que il [a] fait garnir,[8]
[Avec lui vont si frere, quil ne voudrent guerpir][9]
Et .xv. chevalier qu’il a fait fervestir.
Qui saissiront Richart, se il s’en velt foïr.
[Renaus entre en la chambre, si a fait l’uis ouvrir] ;[10]
Là où il vit Richart, sel commenche à laidir :
« Di moi, fils à putain, Dex te puist maleïr !
Por coi as mors mes homes que te fis [ci] venir ? »[11]
Quant Richars vit Renaut, en piés [prist à saillir],[12]
Si dist : « Bien veigniez, sire, or me faites oïr.
- ↑ 14863 L geta jus]. Corrigé par Michelant. M le vers manque.
- ↑ 14864-14869 Manquent à M. On a vu le résumé de A. — Michelant avait omis le v. 14869.
- ↑ 14870 L oant i venismes. M quant chen veïsmez par la vierge hanourée.
- ↑ 14871 L fui.
- ↑ 14872 M Et il remest laiens qu’il n’en fit remuée.
- ↑ 14873 M manque le vers. A Puis dit à Yonnet : La chambre ai delivrée.
- ↑ 14875 A du sans cuida issir. M manque le vers.
- ↑ 14878 L corrent. M courut. L ont. M a.
- ↑ 14879 Sic M. L manque.
- ↑ 14882 Sic M. L manque.
- ↑ 14885 L fis venir. M fis chi venir.
- ↑ 14886 Sic M. L en piés en est saillis.
