« Seignor enfant, [fet] il, ge nel vos doi celeir,[1]
Vos en ales à cort vos armes demander.
Il i a .i. lignage qui molt fait à doter,
Enfant, gardes vos bien d’ax folement joer ;
Et encore vos voil ge autre rien commender ;
Se vos venoit avant ne demone ne per
Qui vos venist avant por vos deshonoreir,
Soies pres del deffendre, si li ales mostrer. »
« Sire, font li enfant, de ce n’estuet parler ;
Ja ne nos laisserons por nul home mater. »
« Enfant, ce dit li peres, venez moi acoler »
Li enfant i tornirent, n’i vostrent trestorner,
Et Renaus les baissa qui molt les pot amer.
Atant s’en est partiz, si [prist] à retorner,[2]
O lui .x. chevaliers que il i fist mener.
Puis cria as enfans qu’il pensent del doner,[3]
Car aveirs chevaliers ne puet an pris monter.[4]
Li dus est repairiés, si laissa ses enfans,
Et il s’en vont ensamble baut et lié et [joians].[5]
Il tindrent lor jornées par plain et par pendant
Qu’il vindrent à Paris dont il sont desirrant.
En la cité herbergent en la plus avenant,
Puis montent el palais qui fu et bel et grant.
Main à main en aleirent cil enfant devisant.
Li baron esgarderent comme il vont passant,
Et dit li uns à l’autre : « Com ci a biax enfans !
Il sunt ammedui frere par le mien esciant.
Garnement vienent querre à Charlon lo vaillant. »
Lor s’en vont vers lo roi miels à miels acostant ;
Por oïr dont il sont, estoient tuit engrant.
- ↑ 16658 L font.
- ↑ 16671 L fist.
- ↑ 16673 P Or pensez de donner.
- ↑ 16674 P Nus avers hom.
- ↑ 16676 L loians. — Dans la rédaction B C V, une fois la paix faite, Charlemagne emmène à sa cour les fils de Renaud, et c’est là que leur père les retrouve en revenant de son pèlerinage. Dans ce remaniement, Renaud arrive chez lui bien après la mort de sa femme et n’a point à s’occuper de l’éducation de ses enfants. L’intérêt du récit y perd. Dans le texte mixte de Michelant, la présence d’Yon et d’Aymon à la cour du roi n’est pas motivée. V. son édition, p. 419-421.
