.viii.c. en y a mors sans lanche et sans espée
De Lombart et d’Englois qui vinrent à saudées.
Et quant Renaus les voit forment li desagrée.
Dame Diu reclama qui mainte ame a sauvée :
« Sire, car nous aidiez, vrais Dix, s’il vous agrée. »
Seignor, franc chevalier, et que vous cheleroie
Des .iiii. fix Aimon qui sont en la tour coie ?
La ducoise se pasme qui de fain se marvoie,
Et si dui enfanchon, cascuns de fain tournoie.
Renaus, li fix Aimon de pité en larmoie :
« Ahi ! peres de gloire, or est morte ma joie.
Che me fait l’empereres qui es tentes s’ombroie.
Chertez, se je cuidaisse qu’il alast ceste voie,
Ja n’eüsse laissié pour tous les Sains qu’on proie,
Ne l’eüsse estranlé à .i. las de coroie. »
La ducoise en apele, moult doucement li proie :
« Dame, ne plourez pas, mais demenez grant joie,
Car Diex nous aidera qui pecheours ravoie ».
Renaus, li fiex Aimon, la ducoise conforte.
Il va en la despense, pain musi en aporte,
Si en donne à la dame, à poi que n’estoit morte,
Et à sez deus enfants, et cascuns s’en conforte.
Grant duel mainent lassus, n’i a ouverte porte.
A Montauban se pasment et en mi et en coste.
Par dedens Montauban avoient grant famine.
Il avoient poi char et poi pain et farine.
Li cheval qui y sont, ne valent une pie
Et Kallez n’en donroit une pomme pourrie.
Durement fait ruer à la grant tour perrine.
Et Renaus fu dedens qui à Jhesa s’acline.
« Baron, che dist Renaus, che est veritez fine,
Nous morrons à dolor, tele en est la destine.
Car tuens Afillé qui baloie la crigne.
Ains que muirons de fain, si en faisons cuisine. »
« Aalart, dist Renaus, car tuons le cheval.
Les braons metons cuire, si le metons au sal.
Se je n’ai à mangier, il m’ira ja moult mal.
Je me larrai caoir contreval chest mural.
Encor[e] m’est il plus, par Diu l’esperital,
De mez enfans que voi demener [duel] coral.
Mi saudoier sont mort et amont et aval.
Or ne sai que je fache, par le cors S. Martial. »
Renaus se dementoit à loi de boin vassal,
Page:Castets - La Chanson des quatre fils Aymon, 1909.djvu/988
Le texte de cette page a été corrigé et est conforme au fac-similé.
960
appendice
